Muqdisho,(insidesoamlia.org)- Waxaa is-casilaaddooda soo qadimay 10 Wasiir oo ka tirsan Xukuumadda Ra'iisal Wasaare Nuur Cadde, kuwaasi oo qaarkood ay dalka ku sugan yihiin, halka kuwo kalena ay ku maqan yihin safarro dibadda ah.

Wasiirrada is-casilay oo qaarkood  shir ku yeesheen Xarunta Wasaaradda Warfaafinta Xukuumadda Federaalka Soomaaliya ayaa waxaa shirkooda shir guddoominayay Ra'iisal Wasaare ku xigeenka, ahna Wasiirka Waxbarashada Avv. C/llaahi Ilka-Xanaf.

Wasiirradan ayaa waxay is-casilaaddooda ku sababeeyeen in Fadeexad Maaliyadeed Baarlamaanka laga geeyay Xukuumadda, in aan hab sharci ah loo soo marin xil ka qaadistii Maxamed Dheere iyo aaney Xukuumadda Federaalka wax miisaniyad ah hor-geynin Baarlamaanka tan iyo markii la dhisay.

Wasiirrada Is casilay

Saalim Caliyow Ibrow,  Ra’isu wasaare ku xigeen ahna Wasiirka Garsoorka

Caydiid C/abdulallahi Ilka Xanaf, Ra’isu wasaare ku xigeen  ahna Wasiirka Waxbarasahada iyo hiddaha

Muxiyidiin Max’ed Xaaji Ibraahim, Wasiirka Gaashaandhiga Dir Biimaal

Xuseen Ceelabe Faahiye, Wasiirka Ganacsiga, Wershadaha iyo Dalxiiska

Cali Axmed Jaamac Jengeli, Wasiirka Arrimaha Debada iyo Iskaashiga Caalamiga

Max’ed Cali Saalax Kaange, Wasiirka Macdanta iyo Tamarta

Cabdirisaaq Ashkir Cabdi, Wasiirka Dib u heshiisiinta, Horumarinta Gobollada iyo Arrimaha Federalka

Cabdi Max’ed Tarra, Wasiirka Boostada iyo Isgaarsiinta

Khadiijo Max’ed Diiriye, Wasiirka Horumarinta Haweenka iyo Arrimaha Qoyska

Carab Cali Diiriye  = Wasiirka Dib u heshiisiinta, hormarinta Gobolada iyo Arrimaha Federalka

Hadal saxaafadeed ay soo saareen Wasiirrada is-casilaadda soo gudbiyay ayaa waxay sheegeen in ay xilka sii heyn doonaan tan iyo inta laga soo magacaabayo Wasiirro kale oo bedela.

Is-casilaadda ay soo gudbiyeen Wasiirradan ayaa waxay ku soo beegmeysaa maalin kadib markii 32 Xildhibaan oo ka tirsan Baarlamaanka Soomaaliya ay ugu baaqeen Xukuumadda Ra'iisal Wasaare Nuur Cadde in ay is casisho, bacdamaa sida ay yiraahdeen ay gashay fadeexad maaliyadeed, sidoo kalena waxay is casilaaddan ku soo beegmeysaa, iyadoo uu khilaaf xoog leh soo kala dhexgalay Madaxweyne Cabdullaahi Yuusuf iyo Ra'iisal Wasaare Nuur Cadde.